Syair Aceh(krueng aceh)

iklan1

Ie krueng aceh jile meutaloe
Pucok di janhtoe lam rimba raya
Ie jeureungeh jile meuarong
U laot jitreun ret gampong jawa

Krueng aceh luah panyang meulingkong
Ie lam gle jitron troh u kuala
Bak teungoh kota meutaloe arong
Pasai peunayong ngon peukan banda


Krueng aceh dilee meuthee that meugah
Masa peurintah Iskandar Muda
Ret teubiet-tamong jalo ngon kapai
Peutamong barang dalam istana

Ret teubiet tamong barang lam peukan
Ret kirem barang u nanggroe lua
Ret teubiet-tamong gampong ngon peukan
Ret lalu-lalang ureung sidumna

Taloe bineh krueng benteng dum teudong
Lam seumak meusom deuh ta‘e hana
Ureung dum manoe deungon seumeurhah
Ramee that leupah agam ngon dara

Di mieng kuala krueng aceh meugah
Benteng that luah teudong meucula
Di lingka benteng teuduek meuriam
Leungkap pasukan peurintah raja

Meusoe nyang tamong peureksa rijang
Meupeu tujuan keunoe troh teuka
Diureung tamong seuot le rijang
Kamoe meudagang u nanggroe gata

Tweet